تلاشِ عشق میں رہرو اگر بھٹکا نہیں ہے

تلاشِ عشق میں رہرو اگر بھٹکا نہیں ہے تو منزل کا نشاں گویا کہ گم گشتہ نہیں ہے

محبّت کی یہ نیرنگی مری تقدیر کیوں ہے جسے میں زندگی سمجھا وہی میرا نہیں ہے

جو رستہ دور لے جاتا مجھے تیرے جنوں سے سرِ کون و مکاں ایسا کوئی رستہ نہیں ہے

کہاں شوقِ وصالِ یار کا منکر ہےکوئی کوئی لےآتا ہے لب پر کوئی کہتا نہیں ہے

سماعت میری کہتی ہے بسا اوقات مجھ سے کسی بے مہر کا ہوگا ترا لہجہ نہیں ہے

سرِ بازارِ دنیا ٹھوک کر دیکھا ہے میں نے مرے سرمائے کا سکّہ کوئی کھوٹا نہیں ہے

بہت ہے جھوٹ کی بھرمار دنیا میں سو دیکھو بلا کا جھوٹ دنیا میں کوئی سچّا نہیں ہے

زمانہِ بھر کی آلائش پہ کیا انگلی اُٹھائیں ہمارے دیس کا ماحول جب ستھرا نہیں ہے

دعا میں زندگی کی اس لیےکرتا ہوں اشعؔر بھروسہ بے وفا پر ایک ساعت کا نہیں ہے