ہر سمت میں تاحدِّ نظر دیکھ رہا ہوں

ہر سمت میں تاحدِّ نظر دیکھ رہا ہوں تُو ہی نظر آتا ہے جدہر دیکھ رہا ہوں

لو آگیا میں یاد اُنہیں آج بالآخر میں اپنی دعاؤں میں اثر دیکھ رہا ہوں

معلوم ہے احوالِ رقیباں مجھے ہمدم ہے آپ پہ کس کس کی نظر میں دیکھ رہا ہوں

بس آپ کی رفعت سے ملی ہے یہ بصارت افلاک پہ توقیرِ بشر دیکھ رہا ہوں

رہتی ہے نظر سینہِ کے ہر داغ پہ جاناں ہر لمحہ تجھے لختِ جگر دیکھ رہا ہوں

اُس پار اندھیروں کے نظر آتا ہے مجھ کو آنے کو ہےتابندہ سحر دیکھ رہا ہوں

منظر ہی یہ موجوں کا فریبی سا ہے اشعؔر صحرا میں سمندر کا ہنر دیکھ رہا ہوں