قید و بند اپنی جگہ ہیں چاہتیں اپنی جگہ

قید و بند اپنی جگہ ہیں چاہتیں اپنی جگہ خواہشیں اپنی جگہ ہیں سرحدیں اپنی جگہ

اہمیت دونوں کی میں تسلیم کرتا ہوں مگر راستے اپنی جگہ ہیں منزلیں اپنی جگہ

بارشوں کے شہر میں کیسے عجب دو روپ ہیں دلکشی اپنی جگہ ہے، زحمتیں اپنی جگہ

اک سوادِ زندگی دونوں سے ملتا ہے مگر فاصلے اپنی جگہ ہیں، قربتیں اپنی جگہ

خواب سے تعبیر کی کچھ دوریاں ہی یوں رہیں دشتِ دل اپنی جگہ ہے رونقیں اپنی جگہ

عہدِ حاضر کی سیاست کا یہ اپنا رنگ ہے دوستی اپنی جگہ ہے نفرتیں اپنی جگہ

فطرتِ انساں میں کیا جھانکا کہ اشعؔر کھل گیا ہے تن آسانی لہٰذا مشکلیں اپنی جگہ