زمانے بھر کی نظر سے بچارہے ہیں تجھے

زمانے بھر کی نظر سے بچارہے ہیں تجھے اسی لیےذرا دل میں چھپارہے ہیں تجھے

جنہیں تو کرکے سُپردِ اجل فرار ہوا وہ سادہ لوگ مسیحا بتارہے ہیں تجھے

جگائے رکھا ہے اک عمر تو نے ہم کو مگر تھپک کے اے غمِ ہستی سلارہے ہیں تجھے

زمانے والوں نے مشکل تو کردیا ہے مگر برت کے زندگی پھر بھی دکھا رہے ہیں تجھے

ڈبو چکا ہے جنہیں تُو خود اپنے ہاتھوں سے وہ ناخدا ہی دوبارہ بنارہے ہیں تجھے

ترا تو کام ہے اے درد دُکھ ہی دینامگر ہم اہلِ دل ہیں سو دل سے لگارہے ہیں تجھے

اُجڑ چکے ہیں جو تجھ سے بچھڑ کے یار اشعؔر وہ آج اپنی کہانی سنارہے ہیں تجھے