ہم تمنّائے مُسرّت میں کہاں تک پہنچے

ہم تمنّائے مُسرّت میں کہاں تک پہنچے سرحدِ غم میں رہے پھر بھی جہاں تک پہنچے

صرف جو مرحلۂ سود و زیاں تک پہنچے وہ کہاں عشق کے سودے کی دکاں تک پہنچے

نشۂ آگہی ٹوٹا ہے تو محسوس ہوا خود فریبی تھی کہ ہم سرِّ نہاں تک پہنچے

عزّتِ دار کو ٹھکرا کے جو مقتل سے گئے ہو گئے لُقمۂ رسوائی، فغاں تک پہنچے

تھا بہت زعمِ تب و تابِ نظّارہ ورنہ طالبِ دید کہاں تیرے گُماں تک پہنچے

زیرِ افلاکِ سُخن چھونے کو پرواز مری بال وہ پر والا کوئی میرے گماں تک پہنچے

دخل تھا عزمِ سفر کا بھی مگر جانتے ہیں وحشتِ شوق نے پہنچایا جہاں تک پہنچے

دل میں پھر آیا مگر حَرفِ تمنّا اشعؔر پہلے کب پہنچا کہ اب نوکِ زباں تک پہنچے