ابھی تک آرزوؤں کاتعاقب کررہا ہوں

ابھی تک آرزوؤں کاتعاقب کررہا ہوں میں استقلال پر اپنے تعجّب کررہا ہوں

یقیناً حوصلہ کم رہ گیا ہے مجھ میں ورنہ مُسلّط خود پہ کیوں خَوفِ تناسب کررہا ہوں

میں لکھ کر گیت کچھ الفت بھرے گاہے گاہے بہ اندازِ دگر سعی ء تقرّب کررہا ہوں

اُسے نزدیک پا کر بھی پلٹ آتا ہوں اکثر مجھے لگتا ہے جیسے میں تعاقب کررہا ہوں

اب ایسا جان لیوا بھی نہیں ترکِ تعلّق نہ جانے کیوں ابھی تک میں تذبذب کررہا ہوں

نہیں تھا ہم زباں لیکن مسلماں تھا وہ اشعؔر تو کیا میں اپنے بھائی سے تعصّب کررہا ہوں