خود کو ہر بخل سے بچا رکھنا

خود کو ہر بخل سے بچا رکھنا ہاتھ امکان بھر کھلا رکھنا

دنیا داری میں بے مثال ہو تم کچھ تو ہم سے بھی سلسلہ رکھنا

فن کی معراج چاہتے ہو اگر تم درِ ذہن کو کھُلا رکھنا

گھر تمہارا ہے یاد ہم کو مگر بام پر اک دیا جلا رکھنا

گھر کی خاطر کسی جگہ گھر میں آندھیوں کا بھی راستہ رکھنا

تم نے دیوانہ کردیا سب کو ہوش میں اک ہمیں ہی کیا رکھنا

دشمنوں سے مرے بتاؤ تمہیں کیا ضروری تھا رابطہ رکھنا

درد سے رشتۂ محبّت کو زخمِ نو کی طرح ہرا رکھنا

دیکھ اشعؔر ترا خیال اب بھی یاد ہے مجھ کو با خدا رکھنا