وابستہ ہوگئے ہیں کسی کہکشاں سے ہم

وابستہ ہوگئے ہیں کسی کہکشاں سے ہم پھیلی سخن کی روشنی گزرے جہاں سے ہم

رکھتے ہیں اپنے عشق کی ہم بھی سپر حضور ڈرتے نہیں ہیں آپ کے تیر و کماں سے ہم

سب کچھ ہےدسترس میں مگر جانتے ہیں خوب جائیں گے ہاتھ جھاڑ کے اک دن یہاں سے ہم

شوقِ سفر نے کیا نہ دکھایا ہمیں مگر واقف کہاں ہیں آج بھی کون و مکاں سے ہم

منزل ہے اب بھی دور یہ ہم کیسے مان لیں اب تو گزر کے آگئے منزل نشاں سے ہم

رشتہ بہت پُرانا ہے دونوں کا اس لیے واقف ہے ہم سے آسماں اور آسماں سے ہم

اک شخصِ بے وفا کے لیے چاہیے، کہو اشعؔر تمہارا طرزِ وفا دیں کہاں سے ہم