نہ ہو جب وہ یہاں تو زندگی ہوتی کہاں ہے

نہ ہو جب وہ یہاں تو زندگی ہوتی کہاں ہے سیہ بختوں کے گھر میں روشنی ہوتی کہاں ہے

ہر اک تجدیدِ الفت پر نہ کیوں ایمان لاتا بھلا اس سے حسین دھوکہ دہی ہوتی کہاں ہے

بہت ہے فی زمانہ عام الفت دلبروں کی مگر یہ دل لگی دل کی لگی ہوتی کہاں ہے

جو دل اک بار دے بیٹھے سو دے بیٹھے کسی کو اس دل سے محبّت دوسری ہوتی کہاں ہے

بہت سے آستاں ہیں منتظر مُدّت سے لیکن ہر اک در پر جبیں سائی مری ہوتی کہاں ہے

پتا کیسے چلے وہ دوست ہے میرا کہ دشمن کسی بھی امتحاں میں دوستی ہوتی کہاں ہے

کسی بھی گوشۂ دل میں ہمارے جانِ اشعؔر سوا تیرے کوئی خواہش کبھی ہوتی کہاں ہے