خزاں میں سایۂ برگِ شجر نہیں ہوتا

خزاں میں سایۂ برگِ شجر نہیں ہوتا شکستہ دل کا کوئی چارہ گر نہیں ہوتا

زمانہ ہوگیا تنہا ہوں میں مگر اب تو خود اپنے ساتھ بھی لمحہ بسر نہیں ہوتا

میں کہہ تو دیتا تجھے چارہ گر مگر تجھ سے کوئی علاجِ غمِ چشمِ تر نہیں ہوتا

اِدھر جو رہتا ہے شب بھر غنیمِ خوابِ سکوں وہ درد شام ڈھلے کیوں اُدھر نہیں ہوتا

غلط ہے اس سے اُمّیدِ خیالِ دل کوئی جو پتّھروں میں رہے، شیشہ گر نہیں ہوتا

جو اُن کی سَمت ہی جائے نہ جانبِ مقتل اب ایسی راہ پہ ہم سے سفر نہیں ہوتا

کسی کے درد کی سوغات ہے یہ سب اشعؔر وگرنہ تیرے سُخن میں ہُنر نہیں ہوتا