جو علم دوست بھی اور باہنر بھی ہوتا ہے

جو علم دوست بھی اور باہنر بھی ہوتا ہے مرےخیال مِیں اہلِ نظر بھی ہوتا ہے

کسی بھی نام سے تم اس کو جانتے ہو مگر جو سایہ دیتا ہے سب کو شجر بھی ہوتا ہے

دعائے قربتِ منزل بھی خوب ہےلیکن مُسافتوں کا مداوا سفر بھی ہوتا ہے

اب اس کے سائے میں ٹھنڈک نہیں تو حیرت کیا کوئی نہ کوئی شجر بے ثمر بھی ہوتا ہے

وہ جس پہ چلتے رہو اور تھکن نہ ہو محسوس وہ راستہ ہی کہیں پُر خطر بھی ہوتا ہے

شبِ طویل کے پیچھے ہی تم یقین رکھو ذرا سی دور پہ وقتِ سحر بھی ہوتا ہے

اگرچہ تلخیء حق گوئی زہر ہے اشعؔر یہی تو زہرمگر بے ضرر بھی ہوتا ہے