بڑی خوشی سے جہاں کے عذاب دیکھیں گے

بڑی خوشی سے جہاں کے عذاب دیکھیں گے یہ فیصلہ ہے مگر تیرے خواب دیکھیں گے

ہماری آنکھ نے دریا سمجھ لیا ہے جسے وہ کتنی دیر رہے گا سراب دیکھیں گے

نظر پڑی تھی سرِ پیش لفظ اور یہ دل مچل اٹھا ہے مُکمّل کتاب دیکھیں گے

دکھا نہ پائیں گے جب آئینے خمار اُنہیں وہ میری آنکھ میں سحرِ شراب دیکھیں گے

ہمیں پتا ہے بس اک ہِجَر کی صلیب نہیں رہِ وفا میں ستم بے حساب دیکھیں گے

نگاہِ شوق کی وارفتگی بھی کم تو نہیں ہیں درمیان میں کتنے حجاب دیکھیں گے

رفاقتوں کا ہے امکاں کہ اور ہِجَر و فراق یہی تو خط میں لکھا ہے جواب دیکھیں گے

بس ایک جھلک میں ہی بے ہوش ہوگئے اشعؔر مُصِر تھے آپ اُنہیں بے نقاب دیکھیں گے