اب کیا ہے کوئی میرا رہا یا نہیں رہا

اب کیا ہے کوئی میرا رہا یا نہیں رہا اپنا سا جو لگا تھا وہ اپنا نہیں رہا

ہے جھوٹ اتنا عام کہ سچ کھو کے رہ گیا کیا جانیے سراب جو دریا نہیں رہا

اک آستیں کے سانپ کا ڈسنا عجیب تھا اب زخمِ دشمنی کوئی گہرا نہیں رہا

کیا سانحہ ہے اہلِ جنوں میں بھی اب کوئی جنسِ وفا کا چاہنے والا نہیں رہا

بے مہریوں پہ اشکِ مُسرّت چھلک پڑے صد شکر ان کے پاس دکھاوا نہیں رہا

اس شہرِ با وفا میں یہ کیسا ہے انقلاب اے دل یہاں تو کوئی شناسا نہیں رہا

ابتک تو خیر زہر کو کہتا رہا ہوں زہر لیکن یہ حوصلہ مجھے سستا نہیں رہا

کس کو فریب دیتے ہو اشعؔر کہ اب تمہیں ترکِ تعلّقات کا صدمہ نہیں رہا