وہ چند لمحوں کا تیرا ملنا خبر نہ تھی بے حساب ہوگا

وہ چند لمحوں کا تیرا ملنا خبر نہ تھی بے حساب ہوگا بچھڑ کے تجھ سے اداس لمحوں کا زندگی بھر عذاب ہوگا

نہ دینا چاہو نہ دو کوئی شے تمہارے در پر سوال لیکر کھڑا ہے سائل جواب دیدو سو یہ بھِی کارِ ثواب ہوگا

گزرتے لمحوں کی تیز آندھی اڑا کے لیجائے گی سبھی کچھ بس اک اثاثہ تمہارے غم کا بچے گا اور بے حساب ہوگا

اُدھر وہ رسوائیاں تمہاری ہوئیں ہیں منسوب ہم سے جاناں ادھر ہمارے کلام کا بھی تمہارے نام انتساب ہوگا

میں دل کی آنکھوں سے کیا پڑھوں گا کسی نظارے کا پیش منظر بیاضِ دل کے ہراک ورق پر تمہارا چہرہ کتاب ہوگا

غمِ جدائی کسے نہیں ہے انا مگر راہ میں کھڑِ ی ہے تمہیں بھی اذنِ سوال مشکل تو کیا کوئی باریاب ہوگا

تمام عمرِ فقیر اشعؔر کٹے گی پہنے پھٹا پرانا مگر اُٹھے گا وہ جب یہاں سے تو ایک دن کا نواب ہوگا