زیرِ پا کچھ دائروں کا سلسلہ رکھا گیا

زیرِ پا کچھ دائروں کا سلسلہ رکھا گیا ہمسفر یوں اک دکھوں کا سلسلہ رکھا گیا

دھوپ سے تپتے ہوئے صحرا پہ ازراہ کرم آگ برساتی رتوں کا سلسلہ رکھا گیا

میرا بندِ ضبطِ گریہ کیا ہے گر اس آنکھ میں بھول کر بھی آنسوؤں کا سلسلہ رکھا گیا

بھولنے والے بتا تو یاد بھی آتا ہے کیوں کیوں اب ایسی قربتوں کا سلسلہ رکھا گیا

ان ہواؤں کا بھرم کھُل جائے گا جب سامنے حق نگر جلتے دیوں کا سلسلہ رکھا گیا

کوئی چھوٹی سی خطا لفظ و بیاں تک جب گئی رائی پر اک پربتوں کا سلسلہ رکھا گیا

تاکہ اے اشعؔر سفر کٹ جائے ہنستے کھیلتے راستے بھر گل رُخوں کا سلسلہ رکھا گیا