اسے جب بھی نگاہِ شوق سے دیکھا ہے میں نے

اسے جب بھی نگاہِ شوق سے دیکھا ہے میں نے خود اپنے کو تماشا بن کے دکھلایا ہے میں نے

گُلاب و یاسمن، چمپا، کنول، یا پھر چنبیلی کوئی بُوجھے تمہارا نام کیا رکھا ہے میں نے

وفا و مہر کی تصویر ہی آنکھوں میں آئی ترے بارے میں جتنی بار بھی سوچا ہے میں نے

گھٹائیں کیوں نہ چھا جاتیں بھلا حدِّ نظر تک تصوّر میں کسی کی زلف کو کھولا ہے میں نے

پئے دیدار کب سے منتظر تھیں میری آنکھیں ذرا سی دیر کو دل سے تجھے مانگا ہے میں نے

خود اپنے آپ کو ہی دوش دینا پڑ گیا ہے مسائل کو تری نظروں سے جب دیکھا ہے میں نے

بہت نادم نظر آیا ہوں اپنی ذات کو میں وفاؤں کی کسوٹی پر اگر پرکھا ہے میں نے

اگر ہے آج کل ہرجائیوں ہی کا زمانہ تجھے پھر کیوں بہ اندازِ دگر چاہا ہے میں نے

مسیحا کو یہ نادانی میں اشعؔر کیا بتاؤں فریبِ دوستی کا زہر بھی چکھا ہے میں نے