جو آگئے ہیں دوبارہ وہ پیار کے موسم

جو آگئے ہیں دوبارہ وہ پیار کے موسم تو کیوں نہ آئیں پلٹ کر بہار کے موسم

نگاہِ شوق پہ میری وہ یوں لجائے کہ بس جمال دے گئے ان کو نکھار کے موسم

ہر ایک رت میں وہ بس جیتنے کا عادی ہے جتا گئے ہیں مجھے میری ہار کے موسم

گمانِ برہمی ء زلف تھا مجھے بھی حضور سو لے کے آیا ہوں دیکھو سنوار کے موسم

گُمانِ ضبط بہت تھا مجھے مگر پھر بھی رلا گئے ہیں کسی اشکبار کے موسم

بیاں تو حسنِ ادائے خرام یوں بھی ہوا چلے ہیں دیکھو وہ سرو و چنار کے موسم

اُمّیدِ وصل کی خوشبو اگر نہ ہو ان میں تو کون کاٹ سکے انتظار کے موسم

مرے یقیں کا سفینہ ابھی سلامت ہے چھُٹے کہاں ہیں ابھی اعتبار کے موسم

یہ اور بات کہ رسوائیوں کا خوف بھی ہے بلا رہے ہیں مگر کوئے یار کے موسم

میں ہاں میں ہاں نہ ملاؤں تو کیا کروں اشعؔر برت چکا ہوں کئی خلفشار کے موسم