آئیے کھُل کے بات ہوجائے

آئیے کھُل کے بات ہوجائے کچھ گھٹن سے نجات ہوجائے

ہیں اگر آپ مُونس و غم خوار کچھ تو شرحِ صفات ہوجائے

تم اگر آملو گھڑی بھر کو زندگی ذی حیات ہوجائے

ہر ستم کرچکے ہو جی بھر کے اب تو کچھ التفات ہوجائے

دن دہاڑے بھی اب یہ ممکن ہے شہر میں اپنے رات ہوجائے

کچھ عجب تو نہیں کہ دل کے ساتھ پھر کوئی واردات ہوجائے

جیتنے کی وہ ضد نہ چھوڑیں گے ہو رہی ہے تو مات ہوجائے

کاش اک بار اس کی چھت پربھی بارشِ حادثات ہوجائے

عین ممکن ہے آرزو اس کی حاصلِ کائنات ہوجائے

کیا خبر پھر کوئی بنامِ وفا بے وفائی کی گھات ہوجائے

دوست ہو تم دعا کرو اشعؔر مجھ کو عرفانِ ذات ہوجائے