ہوجائیں ذرا پہلے ملاقات کی باتیں

ہوجائیں ذرا پہلے ملاقات کی باتیں پھر سامنے آئیں گی خیالا ت کی باتیں

جب تک تمہیں حاصل ہے، یہ سرمایہء ہستی کرتے رہو کچھ اور مناجات کی باتیں

ویسے تو ہنر مندی میں کچھ کم نہیں وہ بھی آتی ہیں اُسے خوب مدارات کی باتیں

سرشاریٔ جذبات کا عالم ارے توبہ یاد آئیں جو بیتَے ہوئے لمحات کی باتیں

ہوجاتا یقیں مجھ کو سمجھتے ہیں وہ اپنا کرلیتے اگر مجھ سے شکایات کی باتیں

دو دل ہوں اگر ایک تو آنکھوں کی زبانی ہوجاتی ہیں محفل میں کنایات کی باتیں

آتی ہیں اگر عالمِ احساس میں اب بھی اک آگ لگا جاتی ہیں اس رات کی باتیں

اک پل میں منالوں گا اُسے دیکھنا اشعؔر معلوم ہیں مجھ کو بھی کرامات کی باتیں