سبھی کو ہونا ہے اک دن یہیں سے وابستہ

سبھی کو ہونا ہے اک دن یہیں سے وابستہ وہ کون ہے جو نہ ہوگا زمیں سے وابستہ

سوال آئیں نہ آئیں لبوں پہ دل سے مگر جواب اُس کا رہے گا نہیں سے وابستہ

قبولیت کا شرف تو اُسی کا حصّہ ہے جو سجدہ ہوتا ہے دل کی جبیں سے وابستہ

وہ جس کا دل نہیں روتا حسین تیرے لیے رہے گا وہ بھی یزیدِ لعیں سے وابستہ

یہی تو دھڑکنیں میٹھے سُروں میں کہتی ہیں وہ شخص ہے رگِ جاں میں کہیں سے وابستہ

کہوں میں کیسے وہ انساں ہے اور زندہ ہے نہیں ہے جو بھی کسی دل نشیں سے وابستہ

ہے جیت جانے میں تیری خوشی تو اے جاناں میں خوش رہوں گا شکستِ حزیں سےوابستہ

تو کیا یہ کافی ہے سر کو اُٹھا کے چلنے میں ہمارا ماضی ہے فتحِ مبیں سے وابستہ

ہمارے دل میں تو آقاؐ کی رحمتوں کے طفیل نجات کی ہیں امّیدیں یقیں سے وابستہ

بیان کیا کرے کوئی بھی اس نظر کا فسوں رہےجو چشمِ غزالِ حسیں سے وابستہ

چلو کہ ہم نے وطن سے وفا نہ کی اشعؔر وہ سرزمین تو ہوتی مکیں سے وابستہ