جس جگہ روشنی نہیں جاتی

جس جگہ روشنی نہیں جاتی کہتےہیں آگہی نہیں جاتی

بات میں سننا چاہتا ہوں وہی آپ سے جو کہی نہیں جاتی

مانا وہ دور ہیں مگر ان تک کیا مری آہ بھی نہیں جاتی

توڑ کر دل بھی اس کے ہاتھوں سے اس کی شیشہ گری نہیں جاتی

دردِ دل کم ہے آج کل لیکن جانے کیوں بے کلی نہیں جاتی

فرقتوں میں بھی میرے کمرے سے اس کی خوشبو کبھی نہیں جاتی

وحشتِ دل کا کیا کریں درماں کیا کریں سرکشی نہیں جاتی

تم چراغوں کی لَو بڑھاتے رہو ورنہ تِیرہ شبی نہیں جاتی

جا چکا وہ پر اس کے آنے پر جو ملی تھی خوشی نہیں جاتی

ہم کہ اک شاعرِ تغزّل ہیں فطرتاً عاشقی نہیں جاتی

رقصِ بسمل ہے اور میں اشعؔر جب تلک بے خودی نہیں جاتی