نکل کے حرف ہی دل سے اگر نہیں آتا

نکل کے حرف ہی دل سے اگر نہیں آتا تو پھر دعاؤں میں کوئی اثر نہیں آتا

شبِ طویل اگرچہ گزرنے والی ہے مگر یہ کیا کہ یقینِ سحر نہیں آتا

نہ آبیاری کی تکلیف کی تو کیسا گِلہ ہمارے پیڑوں پہ اچھّا ثمر نہیں آتا

وہ اس خیال سے آتا ہے کوئی یہ نہ کہے کہ میرے خوابوں میں لختِ جگر نہیں آتا

وہ اور لوگ تھے جو کل میں جھانک لیتے تھے اب اتنی دور کسی کو نظر نہیں آتا

برابری کا جو دعویٰ کریں تو کیسے کریں عدو کا جیسا کوئی کام کرنہیں آتا

ہمارے زخم بھِی ضدّی سے ہیں بہت اشعؔر رہیں گے تازہ اگر چارہ گر نہیں آتا