جسے بھی حُسنِ سراپا دکھائی دیتا ہے

جسے بھی حُسنِ سراپا دکھائی دیتا ہے اُسے تو عشق تماشا دکھائی دیتا ہے

ہماری ذات میں جلوہ نما ہے جس کا وجود کسی کسی کو وہ جلوہ دکھائی دیتا ہے

تمہاری سمت جو محفل میں دیکھتا بھی نہیں تمہارے عشق میں ڈوبا دکھائی دیتا ہے

وہ سادہ لوح وہ سادہ سخن وہ سادہ لباس سبھی کو انجمن آرا دکھائی دیتا ہے

جو آنکھ موند کے رکھتے ہیں دیکھنے کے لیے نہ پوچھیے اُنہیں کیا کیا دکھائی دیتا ہے

وہ دل جو ٹوٹا تھا مجھ سے بلا ارادہ سہی مرے ضمیر کو کعبہ دکھائی دیتا ہے

نظر تو عادی ہے اپنی روایتوں کی حضور نیا سُخن ہمیں کس کا دکھائی دیتا ہے

قدسخن کی طرف ہو نظر تو اپنے سوا سبھی کا قد قدِ بالا دکھائی دیتا ہے

تلاشِ غیر میں دیکھا ہر ایک سمت مگر ترا ہی پیکرِ یکتا دکھائی دیتا ہے

غبارِ دل کو مرے آنسوؤں نے کیا دھویا جسے بھی دیکھوں میں اچھا دکھائی دیتا ہے

بحال رکھتا ہے اُمِّید، جاں بہ لب اشعؔر وہ اک سراب جو دریا دکھائی دیتا ہے