وہ اب بھی رہنا بہت محو خواب چاہتے ہیں

وہ اب بھی رہنا بہت محو خواب چاہتے ہیں جو بیٹھ کر لبِ دریا سراب چاہتے ہیں

جنہیں ہے زعم کہ ہیں ماورائے سود و زیاں مری وفاؤں کا وہ کیوں حساب چاہتے ہیں

لباس گیلے ہوں سنتے ہی جنکے لفظِ جہاد وہ مدرسوں کا بدلنا نصاب چاہتے ہیں

ہم آنکھیں مُوند کے دستِ دعا اُٹھائے ہوئے تمہارے جلوؤں کی آنکھوں میں تاب چاہتے ہیں

سُنا یہ ہے کہ محبّت بڑا ہے کارِ ثواب سو کیا بُرا ہے جو ہم بھی ثواب چاہتے ہیں

بدل بدل کے وہ چہرے ہزار آئیں مگر ہمیں پتا ہے جو خانہ خراب چاہتے ہیں

حسابِ عمرِ مُحبّت لکھیں ہی کیوں اشعؔر پتا ہے تم کو تمہیں بے حساب چاہتے ہیں