اس نے بدلا نہیں اب تک وہ سزا کا انداز

اس نے بدلا نہیں اب تک وہ سزا کا انداز مجھ سے اب تک ہے وہی دستِ صبا کا انداز

اس کے خنجر سے ملے گی دلِ بسمل کو حیات درد کا حد سے تجاوز ہے بقا کا انداز

آنکھ سے آنکھ ملا کر مرا ساغر بھردے تو بھی اپنا مرے ساقی کی عطا کا انداز

ایک مُدّت سے پکارا نہیں میں نے اس کو بھول جائے نہ مجھے اس کی صدا کا انداز

ہر تلاطم سے وہ کشتی کو بچا رکھتا ہے ناخدا خوب سمجھتا ہے ہوا کا انداز

میں ترے ہاتھ پہ پھر صبر کی بیعت کرلوں تو مرے سامنے رکھ اپنی جفا کا انداز

تم سمٹتے ہو تو آنکھوں میں اُتر آتے ہو دور تک پھیلتا جاتا ہے حیا کا انداز

تیرے نالوں کا اثر ہوکے رہے گا اشعؔر تو فقیرانہ تو کر اپنی دعا کا انداز