تو جسے حرفِ وفا سے بدگماں کرجائے گا

تو جسے حرفِ وفا سے بدگماں کرجائے گا وہ دلِ ناشاد تجھ پر قرضِ جاں کرجائے گا

دیکھنا وہ لے کے دل کیسا زیاں کرجائے گا زندگی کو زندگی پر نوحہ خواں کرجائے گا

دھوپ میں جلتے ہوئے جب بھی مجھے دیکھے گا وہ ریشمی زلفوں کا اپنی سائباں کرجائے گا

لب تو میں نے سی رکھے تھے یہ کسے معلوم تھا آپ کا پیکر مری آنکھیں زباں کرجائے گا

ڈال کر وہ درمیاں چلمن پہ چلمن دیکھنا آرزوئے دید میری حرزِ جاں کرجائے گا

کشتیٔ جذبات جب پائے گا وہ مغلوبِ موج اپنی بانہوں کو مثالِ بادباں کرجائے گا

بس یہی کہنا ہے اشعؔر کا کتاب اندر کتاب تلخ و شیریں جو بھی ہے نذرِ جہاں کرجائے گا