نہ پوچھو زندگی بھر اور کیا کرتا رہا ہوں

نہ پوچھو زندگی بھر اور کیا کرتا رہا ہوں بس اک ہرجائی پر جی جان سے مرتا رہاہوں

نہیں بھٹکا ہوں میں اب تک یقیں محکم ہے میرا نشاں منزل کا لے کرآنکھ میں چلتا رہا ہوں

مکافاتِ عمل کا ہو یقیں اس کو لہٰذا اُسے ہرجائی، ظالم بے وفا کہتا رہا ہوں

مجھے معلوم ہے انجام میرا کیا ہے ناصح میں اپنی وحشتوں کی آگ میں جلتا رہا ہوں

علاجِ خود نوشتہ ہے مرا گریہ مسلسل میں اپنا زخمِ دل پیہم ہرا کرتا رہا ہوں

کسی جلتی ہوئی اک موم بتی کی طرح سے تمہارے شوق کی اشکال میں ڈھلتا رہا ہوں

مرا دل مجھ سے کہتا ہے وہ لوٹ آئے گا اشعؔر اسی خوش کن رہِ امِید پر چلتا رہا ہوں