درد بے حد تھا اذیّت کا گلہ کوئی نہ تھا

درد بے حد تھا اذیّت کا گلہ کوئی نہ تھا ہاتھ پھیلے تھے لبوں پر مدّعا کوئی نہ تھا

میری نظروں میں صنم پہلے بھی تھے کتنے مگر دیوتا بن کر مرے دل میں سجا کوئی نہ تھا

سب کی نظریں ٹک گئی تھیں بس مرے اشعار پر مبتلائے خوابِ خوش فہمی سنا کوئی نہ تھا

میں بہت ناراض تھا اس سے مگر اس کے لیے جو نہیِں تھا دل میں وہ حرفِ دعا کوئی نہ تھا

پھر وہ آخر کون تھا کل خواب کی دہلیز پر ذہن کے پردوں میں تو تیرے سوا کوئی نہ تھا

یہ اندھیرے پھر کہاں سے آگئے، کل کی ہے بات جگنوؤں کی ضربِ کاری سے بچا کوئی نہ تھا

آتشِ عشقِ بُتاں سے دل بچاتے کس طرح حاصلِ سوزِ مُحبّت ناروا کوئی نہ تھا

اُس دیے کو اور بھی خطرات لاحق تھے مگر ایسی طوفانی ہواؤں کا پتا کوئی نہ تھا

تیری آہٹ کا گُماں ہی تھا دلِ اشعؔر کو بس دوسرا امکان ہی مثلِ صبا کوئی نہ تھا