جیون گر ایسا ہے جیسے تنہائی کی بات

جیون گر ایسا ہے جیسے تنہائی کی بات پھر تو جاں سے گزرجانا ہے دانائی کی بات

میرے پیار پہ سب کا حق ہے میں کیسے سمجھاؤں اہلِ وفا میں کون سنے ہے ہرجائی کی بات

اپنے بچِے جیسے بھی ہیں چاند ستارے ہیں گھر سے باہر کیوں کرتے ہو رسوائی کی بات

اس کے بیاہ کی باتیں یوں تو چلتی رہتی ہیں سود و زیاں پر رک جاتی ہے شہنائی کی بات

جب تک دریا گر نہیں جاتا کسی سمندر میں کیوں دریا سے کی جاتی ہے گہرائی کی بات

بادِ صبا تُو کرسکتی ہے یوں بھی مجھے فرحاں پہلے ان کا ذکر چلے پھر پُروائی کی بات

شیشہِ کی دیواریں اشعؔر بازی جیت گئیں آئینوں سے پوچھ کے دیکھو رعنائی کی بات