تلخ لگتی ہیں زہر سی باتیں

تلخ لگتی ہیں زہر سی باتیں ایک حد سے گری ہوئی باتیں

ان سے جس وقت گفتگو ہوگی دیں گی احساسِ نغمگی باتیں

سُن رکھا تھا کہ پھول جھڑتے ہیں ہو رہی تھیں جلی کٹی باتیں

ایسی لگتی ہیں تیرے ہونٹوں پر جیسے گلدان میں سجی باتیں

ان لبوں سے نکل کے رکھتی ہیں اک قیامت کی دلکشی باتیں

لب پہ دونوں کے کچھ نہ آیا مگر ہوگئیں کتنی اَن کہی باتیں

اہلِ کینہ کدورتیں رکھ کر کرتے ہیں کیا ہنسی خوشی باتیں

خامشی موت کی علامت ہے گویا دیتی ہیں زندگی باتیں

ہم بھی انسان ہیں ترے جیسے ہوگئی ہوں گی دو رُخی باتیں

اُن کی سیرت کا ذکر جب بھی ہوا کر گئیں گھر میں روشنی باتیں

کس قدر ہوتی ہیں عمیق نہ پوچھ وہ جو کرتا ہے سرسری باتیں

ہوش میں کیا رہیں بھلا اشعؔر سحر کردیتی ہیں تری باتیں