تم یاد نہ آؤ کبھی ایسا نہیں ہوتا

تم یاد نہ آؤ کبھی ایسا نہیں ہوتا اک زخم بھی دل کا مرے اچھّا نہیں ہوتا

اچھّا تھا کوئی خواب ہی دیکھا نہیں ہوتا ابتک کسی تعبیر میں اُلجھا نہیں ہوتا

میں روز سرِ شام بچھا دیتا ہوں آنکھیں وہ شخص کسی روز بھی آیا نہیں ہوتا

میں کیسے چراغاں کروں اک رات بھی گھر میں بتلاؤ میں کس رات میں تنہا نہیں ہوتا

کچھ غم نہیں گر وہ بھی سویروں کا ہے ساتھی شب بھر تو مرا سایہ بھی میرا نہیں ہوتا

جی بھر کے اُسے ڈوب کے دیکھا تو کئی بار بھر جائے مگر جی کبھی ایسا نہیں ہوتا

تھکنے نہیں دیتی مجھے منزل کی تمنّا رکنے کو مرا دل سرِ جادہ نہیں ہوتا

ملتا ہی کہاں مجھ کو کنارہ کوئی اشعؔر اک موج نے گر ٹوٹ کے چاہا نہیں ہوتا