دوستو گردشِ دوراں سے پریشان نہ ہو

دوستو گردشِ دوراں سے پریشان نہ ہو ممکنہ خطرۂ طوفاں سے پریشان نہ ہو

عین ممکن ہے عدو تیرا قوی ہو پھر بھی ہو کے انساں کسی انساں سے پریشان نہ ہو

زندگی دیتی ہے یہ مُردہ زمینوں کو تری اس لیے زحمتِ باراں سے پریشان نہ ہو

روشنی کی تجھے پڑجائے گی عادت اک دن اس قدر مہرِ درخشاں سے پریشان نہ ہو

جس کو آتا ہی نہ ہو کوئی فنِ شیشہ گری کیسے ٹوٹے ہوئے پیماں سے پریشان نہ ہو

تھام کر رکھو سکوں بخش خدا کی رسّی اور کسی حملۂ شیطاں سے پریشان نہ ہو

تو سلامت رہے تا دیر دعا ہے لیکن جانِ جاں موت کے امکاں سے پریشان نہ ہو

اپنی آنکھوں میں اگر شوق سے رکھا ہے مجھے پھر کسی دیدۂ حیراں سے پریشان نہ ہو

حکمت و فہم سے کر اپنی حفاظت اشعؔر سازشِ مجلسِ یاراں سے پریشان نہ ہو