اُمّید کی آنکھوں سے نظّارے نہیں دیکھے

اُمّید کی آنکھوں سے نظّارے نہیں دیکھے طُوفاں سے الگ رہ کے کنارے نہیں دیکھے

کب ہم نے بغاوت کا ارادہ کیا جاناں کس روز بھلا تیرے اشارے نہیں دیکھے

دیکھا کیے اک عمر کسی خواب کا رستہ اور اپنے مُقدّر کے ستارے نہیں دیکھے

کیوں ہم سے چھپا پھرتا ہے وہ شعلہ بہ داماں کیا ہم نے کبھی برق شرارے نہیں دیکھے

کیسے نہ تلاطم کو یقیں جیت کا ہوتا جب اس نے عزائم ہی ہمارے نہیں دیکھے

جب کھُل کے ہوئی بات تو آپس کے مسائل ہر شخص نے مل جل کے سنوارے نہیں دیکھے

یوں ساتھ مرے غم کا سمندر ہے کہ اشعؔر گریہ کے کبھی جھُوٹے سہارے نہیں دیکھے