مشینی سا عجب سارا زمانہ ہوگیا ہے

مشینی سا عجب سارا زمانہ ہوگیا ہے محبّت کا تصوّر ہی فسانہ ہوگیا ہے

جسے ہم نے مسیحا جان رکھا تھا اسے تو عیادت کے لیے آئے زمانہ ہوگیا ہے

کوئی بے حد محبّت دے تو پھر محتاط رہنا بہت اخلاص کا قصّہ پرانا ہوگیا ہے

ہوا کرتی تھیں فرشِ راہ کل جن کی نگاہیں انہی کا کام اب آنکھِیں دکھانا ہوگیا ہے

وفا و مہر کا وہ کارواں اب کیا ملے گا جو تنہائی سے اُکتا کر روانہ ہوگیا ہے

وہی اک شخص جو ٹھنڈک ہوا کرتا تھا دل کی اسی کا مشغلہ اب دل جلانا ہوگیا ہے

وفا کی ہے اُسے امید بس اک بے وفا سے تو کیا اشعؔر حقیقت میں دوانہ ہوگیا ہے