کسی کے دل میں لکھا حَرفِ آرزو بھی نہیں

کسی کے دل میں لکھا حَرفِ آرزو بھی نہیں میں ایک لمحہء رفتہ کی آبرو بھی نہیں

ہے آئینے کی طرح عکسِ آئینہ خاموش وہ شخص آج تو مائل بہ گفتگو بھی نہیں

جب اس سے رشتہ نہ رکھا تو پھر یہ غم کیسا کہ اس کے دل میں تری کوئی جستجو بھی نہیں

سراب ہے کہ نہیں وہ، پتا نہیں لیکن بجھا دے پیاس جو میری وہ آبِ جُو بھی نہیں

ٹھہر تو جانا پڑے گا مجھے کہ منزل سے نظر چرائے گزر جانا میری خُو بھی نہیں

یہ میرا حُسنِ نظر ہے کہ اس کا سحرِ جمال وہی نظر میں بسا ہے جو رُو بہ رُو بھی نہیں

یہ مانا ہم تو بہت مضطرب رہے شب بھر پہ جس نے چین سے کاٹی وہ شخص تُو بھی نہیں

یہ کیسا ظلم ہے گُل چیں کا دیکھیے اشعؔر ہمارے واسطہِ گلشن میں رنگ و بوُ بھی نہیں