سجا کے ان کو تصور میں گفتگو کرنا

سجا کے ان کو تصور میں گفتگو کرنا نیا نیا تو نہیں ایسی جستجو کرنا

زمانہِ بھر کا ہدف اور کیا ہے اس کے سوا ہمارے پیار کو بدنام کُو بہ کُوکرنا

خودی کا پاس ہے جن کو کہاں ہےسہل اُنہیں انا سے جیتنا پہلے پھر آرزو کرنا

نہ جانے کیوں مجھے لگتا ہے عطر بیز سدا تمہارے بارے میں پھولوں سے گفتگو کرنا

چلو کہ رنگِ بہاراں کا لطف دیس میں ہے غبارِ دشت میں کیا جشنِ رنگ و بُو کرنا

ہے جو بھی کہنا کہو تم مگر یہ دھیان رہے ہمیں بھی آتا ہے آئینہ رُو بہ رُو کرنا

جو کہہ دیا ہے کسی نے تو سارقوں کی طرح ہمیں نہ آیا وہ تخلیق ہُو بہُو کرنا

سحر کا لطف تو جب ہے کہ ہرطرف ہو سحر سو تم اُجالا جو کرنا تو چار سوُ کرنا

حدِ تنزّلِ تہذیب چھوڑو یار ہمیں نہ آیا آپ سے تم، اور تم سے تُو کرنا

بکھرنے دیتے نہیں آبروئے غم اشعؔر دکھاوا ہوتا ہے دامن کو آبِ جُو کرنا