محبت کب بھلا اک جرم کہلائی نہیں جاتی

محبت کب بھلا اک جرم کہلائی نہیں جاتی چلے بھی جائیں دنیا سے تو رسوائی نہیں جاتی

کبھی تنہائی میں یادوں کے جھرمٹ ساتھ رہتے ہیں کبھی ہنگامۂ محفل میں تنہائی نہیں جاتی

قلم کاغذ ہمیں زنداں میں آخر کون دے لیکن طبیعت سے ہماری خامہ فرسائی نہیں جاتی

محبّت کا سفر چھوڑا مگر پھر بھی یہی دیکھا جو قسمت میں لکھی ہے آبلہ پائی نہیں جاتی

زمانہ ہوگیا بچھڑے ہوئے تجھ سے مگر جاناں تری سانسوں کی کمرے سے شناسائی نہیں جاتی

جئیں گے اور کتنے دن بھلا اس حبس میں آخر ہمارے روزنِ دل تک تو پُروائی نہیں جاتی

سرِ تسلیم خم رکھتے ہیں سب کی آرزوؤں پر کسی کی خواہشِ دل ہم سے ٹھکرائی نہیں جاتی

درِ دل پر تم اپنے لاکھ تالے ڈال کر رکھو محبّت خود ہی آجاتی ہے بلوائی نہیں جاتی

سجالیتے ہیں محفل یاد کی زنداں میں بھی اشعؔر طبیعت سے ہماری بزم آرائی نہیں جاتی