بھنور میں ناخدا جب بھی کوئی داخل ہوا ہے

بھنور میں ناخدا جب بھی کوئی داخل ہوا ہے خدائی کا وہ مجبوراً سہی قائل ہوا ہے

دلِ ویراں میں کیا رکھا تھا پہلےدیکھنے کو تمہارا درد پا کر دید کے قابل ہوا ہے

محبّت میں ابھی سے موت کا طالب ہے ناداں ابھی انعامِ رسوائی کہاں حاصل ہوا ہے

ہوا کرتی تھیں آیاتِ محبّت جزوِ ایماں مسلسل دل جو ٹوٹا ہر یقیں باطل ہوا ہے

ہمارے درمیاں چاہت بھی ہے مہرو وفا بھی انا کا حادثہ پھر بھی خطِ فاصل ہوا ہے

مری حیرت زدہ آنکھِیں ابھی تک بے یقیں ہیں مسیحا جس کو ہونا تھا مرا قاتل ہوا ہے

مزہ آجائے گا اے پتھرو اب دیکھنا تم محبت میں لہو میرا تو اب شامل ہوا ہے

مری عرضِ تمناّ پر وہ اس طرح تھا برہم مجھے یوں لگ رہا تھا جیسےکچھ مائل ہوا ہے

نہ کیوں اشعؔر کیا کرتا ترے در کی فقیری تونگر ہوگیا ہے جو ترا سائل ہوا ہے