ہر ایک سمت ہے حسن جہاں، جہاں دیکھوں

ہر ایک سمت ہے حسن جہاں، جہاں دیکھوں اسے نہ دیکھوں میں ناصح تو پھر کہاں دیکھوں

فریبِ حسنِ خرد کا اسیر ہوجاؤں اگر کمالِ جنوں اپنا رائیگاں دیکھوں

سحابِ زلف کی رخ سے نقاب ہٹے تو ذرا میں پورے چاند کا مسحور کن سماں دیکھوں

یقیں تمہاری محبت کا آہی جائے اگر رُخِ حسیں پہ تبسّم بہ شکلِ ہاں دیکھوں

میں اپنے بارےمیں جب تک ہے زندگی میری خدا کرے نہ کوئی دوست بدگماں دیکھوں

میں بے وفا اُسے کہہ دوں مگر بتائے کوئی وفائے عمر کو کس دل سے رائیگاں دیکھوں

تو کیا مناظرِ دنیا سے پھیرلوں آنکھیں جدہر تمہارا اشارہ ہو بس وہاں دیکھوں

میں چاہتا ہوں کہ حیرت میں آئینے پڑجائیں چھپا ہوا پسِ آئینہ سب عیاں دیکھوں

ہے ممکنات میں یہ بھی مرا خیالِ نظر خراجِ حسن کو عاشق کا امتحاں دیکھوں

یہ آرزو تو عجب ہے مگر یہ ہے اشعؔر خود اپنے گھر میں اُسے اپنا میزباں دیکھوں