تیرے دکھ پہ نہ ہوتی آنکھ نم کیا

تیرے دکھ پہ نہ ہوتی آنکھ نم کیا رُلا دیتا ہے پتّھر کو تو ہم کیا

خزاں کے پھر نہ آنے کا بھرم کیا ستم ہوگا نہ بالائے ستم کیا

تنفُّر اتنا کیوں بین المذاہب ہمیں بتلائیں گے دَیروحرم کیا

تمہاری آنکھ سے جو پی چکا ہو پھر اس کے سامنے اوقاتِ جم کیا

سُخن کے میرے اپنے راستوں پر نگاہِ غیر کا نقشِ قدم کیا

بہ ہرقیمت ہدف ہے جس کا منزل تذبذب کیا اُسے اور پیچ و خم کیا

خیالِ یار کی بارش ہے پیہم تو پھر دل میں سوادِ درد کم کیا

رقیبوں میں اُنہیں دیکھا تو بولے نہیں دیکھے ہیں خار و گل بہم کیا

پُجاری ہے ترا اشعؔر کہ جاناں کوئی پُوجا نہ ہو جس کی صنم کیا