اگرچہ باطنِ روشن سیاہ کرتے رہے

اگرچہ باطنِ روشن سیاہ کرتے رہے منافقت سے مگر سب نباہ کرتے رہے

وہ خود کشی ہی تو کرتے رہے جو دانستہ جنوں کی زد پہ خِرَد کی سپاہ کرتے رہے

تم عسکری ہو، نہتّوں سے ہار جاؤگے دھیان رکھنا کہ ہم انتباہ کرتے رہے

اُفق کو چھونے کے قابل بنادیا جس نے اسی زمیں کو فلک سے تباہ کرتے رہے

خبر تھی ہم کو زمینی حقیقتوں کی مگر سرشتِ مہر کا پھر بھی گناہ کرتے رہے

وہ ہمنوا کہ جو شاعر کے ساتھ آئے تھے تھکے ہوئے تھے مگر واہ واہ کرتے رہے

وہ چاہتے تھے تعلّق تمام ختم نہ ہو سو التفات بھی کچھ گاہ گاہ کرتے رہے

خلوص و مہر و وفا اجنبی تھے جن کے لیے ہمیں وہ نذر کئی اشتباہ کرتے رہے

یہ اور بات کہ اشعؔر بھُلا نہ پائے مگر تمہارے غم کو بھُلانے کی چاہ کرتے رہے