ہمیں نفرت ہے کچھ لوگوں کی خوئے دورُخی سے

ہمیں نفرت ہے کچھ لوگوں کی خوئے دورُخی سے وگرنہ کون کتراتا ہے یارو دوستی سے

تری خواہش کو نتھی کرلیا ہے زندگی سے سو میری ہر خوشی ہے منسلک تیری خوشی سے

مری اس بات کو مت جوڑ دیجو شاعری سے اجل کا مرحلہ آساں ہے تیری برہمی سے

دیا کوئی بھی گر جیتا نہ ہوتاتیرگی سے تو پھر کیا دشمنی ہوتی کسی کو روشنی سے

فریبِ وعدۂ پیہم سے یوں لگتا ہے گویا مسرّت پارہے ہوتم ہماری بے کلی سے

یہ مت سوچوہمارا کیا زیاں ہے یہ بتا دو تمہیں کیا فائدہ ہوگا ہماری بے خودی سے

ہمیں جب سے ملا ہے آئینہ اک اپنے اندر ہمارا واسطہ رہنے لگا خود آگہی سے

بہت ممکن ہے تم بھی تاجور ہوجاؤ اک دن اگر خوش ہوگیا کوئی تمہاری بندگی سے

علی الاعلان کیوں کہتے تمہیں ہرجائی اشعؔر اگر ڈرتے تمہارے دوستوں کی دشمنی سے