کاش یہ فکرِ محبّت تجھے حاصل ہوجائے

کاش یہ فکرِ محبّت تجھے حاصل ہوجائے عین فطرت ہے کہ دل عشق پہ مائل ہوجائے

تم اگر وصل کے ہر خواب کو یکجا کردو صاف قرطاس پہ تصویر مرا دل ہوجائے

اس لیے کرتا ہوں آغازِ سخن چھو کے تجھے تاکہ ہر شعر مرا رشک کے قابل ہوجائے

جرأت کفر میں دیکھوں گا تری شیخ مگر آیتِ عشق تو تجھ پر کوئی نازل ہوجائے

نذر کردوں میں دل و جاں اُسے خود ہی لیکن معترف مجھ سے محبّت کا تَو قاتل ہوجائے

زندگی میں تو چلو کون مُکمّل ہوگا کیا یہ ممکن ہے کہ مرکر کوئی کامل ہوجائے

ہم نے مانا کہ تمہیں پیار ہے طوفاں سے مگر کیا کروگے جو یہ طوفان ہی ساحل ہوجائے

چل دیا ہوں تری راہوں پہ تو ممکن ہے کوئی رنگ تیرا مرے اطوار میں شامل ہوجائے

عشق اور جاں کا زیاں لازم و ملزوم سہی کیا گراں ہے جو یہ سودا مجھے حاصل ہوجائے

جو سبق تو نے دیا سہل تھا لیکن اشعؔر عین ممکن ہے کہ آموختہ مشکل ہوجائے