کہوں میں کیسے اُسے کچھ خیال تھا ہی نہیں

کہوں میں کیسے اُسے کچھ خیال تھا ہی نہیں مرے لبوں پہ تو کوئی سوال تھا ہی نہیں

یہ سچ ہے میں تری محفل میں آسکا نہ مگر تو کیا سمجھتا ہے مجھ کو ملال تھا ہی نہیں

ہمارے زخموں کو معلوم ہے کہ پاس ترے علاج کوئی پئے اندمال تھا ہی نہیں

گلِے، شکایتیں، شکوے کیے تو ہوتے کبھی تمہارا کیا کوئی پُرسانِ حال تھا ہی نہیں

نہ ہوتا        زہرِ تکبّر کا وہ شکار مگر نظر میں اس کی یہ جامِ زوال تھا ہی نہیں

تو کیا یہ سچ ہے کہ اک میرے دم سے پہلے یہاں تمہارے شہر میں قحط الرّجال تھا ہی نہیں

ہمارے آقاؐ سے پہلے تمام دنیا میں کوئی بشر بھی کہیں بے مثال تھا ہی نہیں

ترے سوا میں کہیں دیکھتا ہی کیا جاناں کہ تجھ سا کوئی جنوب و شمال تھا ہی نہیں

ذرا سا سر کو جھکانا تھا بس مگر اشعؔر سرشتِ دل میں یہ اوجِ کمال تھا ہی نہیں