کبھی کبھی تو وہ کیسا کمال کرتے ہیں

کبھی کبھی تو وہ کیسا کمال کرتے ہیں حدِ خیال سے بڑھ کر خیال کرتے ہیں

سکوں سے گزریں گے شاید اُنہی کے دن اکثر جو اپنی راتوں کو نذرِ ملال کرتے ہیں

کہاں سے لائیں خیالِ طرب غزل کے لیے ہمیں کہاں وہ کچھ ایسا نہال کرتے ہیں

دوبارہ کب کوئی خواہش لبوں پہ آئی مرے وہ کیوں سزائیں مُکرّر بحال کرتے ہیں

ادائیں جن کی سکھاتی ہیں سرکشی ہم کو وہی تو وحشتِ دل پائمال کرتے ہیں

ستم کے باب میں ان کی مثال کوئی نہیں عنایتیں بھی مگر بے مثال کرتے ہیں

کبھی ہنساتے ہیں بے حد کبھی رلائیں بہت وہ جینا مرنا ہمارا محال کرتے ہیں

لگاتے رہتے ہیں زخموں پہ بارہا نشتر مگر وہ ایسا پئے اندمال کرتے ہیں

جواب حضرتِ ناصح کو کیا ملے اشعؔر مرے جنوں سے خرد کے سوال کرتے ہیں