تم سے کب چاہا مجھے عمر کی شاہی دے دو

تم سے کب چاہا مجھے عمر کی شاہی دے دو مجھ کو دو روز تصرّف کی دعا ہی دے دو

تم کو معلوم ہے کس شے کا سزاوار ہوں میں حق پرستوں کی طرح آؤ گواہی دے دو

وحشتِ دل پہ تو اب یہ ہے کہ پردہ ہی رہے عقل کے نام کا اک ہم کو سپاہی دے دو

چاہو تو رکھ کے مرا دل مجھے دے دو دنیا چاہو دل توڑ کے دنیا کی تباہی دے دو

ظلمتِ عصیاں کو درکار ہے سورج لیکن کم سے کم نُورِ ہدایت کا دیا ہی دے دو

میری اُمّیدوں کی ہرشمع بجھا کر جاناں زندگی بھر کی مُقدّر کو سیاہی دے دو

کچھ تو ہو میری وفاؤں کا صلہ اور اگر کچھ نہیں سوچ کے رکھا تو سزا ہی دے دو

اس تغافل سے تو اچھا ہے کہ برہم ہوجاؤ کم نگاہی سے بھلی شعلہ نگاہی دے دو

دے نہیں سکتے محبّت چلو ایسا کرلو تم مجھے میری محبّت کا صلہ ہی دے دو

حبسِ تنہائی تو اشعؔر کے لیے موت ہے اب زندگی کے لیے آنچل کی ہوا ہی دے دو