سارے طوفانوں نے سمجھا ہے کسی قابل مجھے

سارے طوفانوں نے سمجھا ہے کسی قابل مجھے اس لیے دیتا نہیں ہے کوئی بھی ساحل مجھے

خواہشِ منزل بھی رکھتا ہوں مگر فی الحال تو کیسا دلکش لگ رہا ہے جادۂ منزل مجھے

مانگ کر ہمدردیاں اغیار سے اپنے لیے کررہے ہیں دوست میرے بھیک کا قائل مجھے

اس طرح سے بانٹ لیتا ہے مرے ہر درد کو ہر خوشی میں اپنی کرلیتا ہے وہ شامل مجھے

عالمِ غربت میں بھی دل تو مرا مفلس نہیں اور دلِ مفلس نہیں تو کیا نہیں حاصل مجھے

اس قدر تو علم رکھتا ہوں کہ میں عالم نہیں لوگ کہتے ہیں تو کہنے دیجیے جاہل مجھے

پھینک جاتی ہیں سرِ ساحل مجھے کیوں بار بار کیوں سمجھ لیتی ہیں موجیں رحم کے قابل مجھے

تم نہیں آتے اگر جاناں تو اتنا جان لو دشت صورت پائے گا ہنگامۂ محفل مجھے

مرگیا ہوتا میں اب تک بالیقیں اشعؔر مگر دیتا رہتا ہے دعائیں بھی مرا قاتل مجھے