دل میں گُدازِ درد کو کم کردیا گیا

دل میں گُدازِ درد کو کم کردیا گیا یوں ختم زندگی کا بھرم کردیا گیا

شمس و قمر چھپا کے پسِ پردۂ فلک سایہ مرے وجود میں ضم کردیا گیا

دل نے وصال چاہا تھا اور ہاتھ پر مرے ریکھا سے حرفِ ہِجَر رقم کردیا گیا

پیہم ہنسا ہنسا کے مجھے اپنے درد پر پلکوں کو میری خیر سے نم کردیا گیا

مجھ کو روایتوں کی سلاسل میں باندھ کر مجبور ضبطِ نقشِ قدم کردیا گیا

کہہ کہہ کے صبح و شام شہِ عجز و انکسار مجھ کو گدائے جاہ و حشم کردیا گیا

خم رہنے کے بجائے کوئی سر جو شہر میں اُٹھتا ہوا لگا تو قلم کردیا گیا

رکھ کر مرے لبوں پہ خود اپنا سوالِ شوق مجھ کو رہینِ چشمِ کرم کردیا گیا

سازش یہی تھی آج اک احسان اور ہو یوں مجھ پہ ایک اور ستم کردیا گیا

خود اپنے دستِ شوق سے دلکش تراش کر بے مول پتھروں کو صنم کردیا گیا

پھیلا ہے اب بھی دامنِ اشعؔر پئے سُخَن گو حد سے بڑھ کے اس کو بہم کردیا گیا