اہلِ جنوں کا ایک زمانہ بے حد مشکل تھا

اہلِ جنوں کا ایک زمانہ بے حد مشکل تھا سچ کو لکھ دینا افسانہ بے حد مشکل تھا

گھر کے سب شیشوں پر میں نے پردے ڈال دیے خود کو آئینہ دکھلانا بے حد مشکل تھا

یوں تو مسائل کا حل میں نے اکثر ڈھونڈ لیا لیکن ہر گتھی سلجھانا بے حد مشکل تھا

اس میں ایک دشمن بھی چھپا تھا لیکن کیا کرتے یار کا وہ چہرہ انجانا بے حد مشکل تھا

وہ افکارِ برہنہ کیوں لے آتے ہو جن کو لفظوں کے کپڑے پہنانا بے حد مشکل تھا

جس کی پلکیں رستہ دینا قتلِ انا سمجھیں اس کے گھر سیلاب کا آنا بے حد مشکل تھا

تیری یادیں وصل کا دھوکہ دیتی رہیں ورنہ فرقت کی صدیوں سے نبھانا بے حد مشکل تھا

اپنی خوشی سے کون بھلا مرجاتا ہے لیکن جیسے جی تو اس کو بھلانا بے حدمشکل تھا

عشق میں پاگل ہوجاتے ہیں اچھے خاصے لوگ بات یہ ناصح کو سمجھانا بے حدمشکل تھا

جس کو ساحل پر ہی سمندر خوف زدہ کردے اس کو لہروں تک لے جانا بے حد مشکل تھا

ہر الزام اُسی پر دھرنا آساں تھا اشعؔر لیکن پھر اپنے کو بچانا بے حد مشکل تھا