سخن ہمارے اگرچہ بڑے کمال کے ہیں

سخن ہمارے اگرچہ بڑے کمال کے ہیں مگر یہ سارے تراشے ترے خیال کے ہیں

ترے سوا بھی چمن میں بہت سے گل ہیں جو بے مثال ہیں ان میں تری مثال کے ہیں

برس رہا تھا جو نعلین پا سے گلیوں میں نظّارہ ہائے مدینہ اُسی جمال کے ہیں

ہمارے زخم ہیں گہرے مگر بڑے امکاں تمہارے حرَفِ تسلّی میں اندمال کے ہیں

ہے ڈر تو یہ بھی کہ بدنام ہونہ جائیں مگر حقیقتاً جو محافظ ہیں ڈر مآل کے ہیں

کروں میں فخر بہت کیا جواب پر اپنے مرے جواب میں جوہر ترے سوال کے ہیں

یہ مہر و ماہ یہ انجم یہ کہکشاں یہ دھنک یہ چھوٹے چھوٹے اشارے ترے جمال کے ہیں

تمام حُسنِ جہاں دیکھنے کے بعد کھُلا نظّارے اچھے تمہارے ہی خدوخال کے ہیں

تمہاری یادیں سمیٹوں تو ایسا لگتاہے تمام گزرے زمانے بھی عہدِ حال کے ہیں

مزاج عرشِ معلیٰ پہ ہیں مگر ناداں یہی نشان تو مظہر ترے زوال کے ہیں

یہی تو لگتا ہے ایّام حج میں چار طرف کہ سارے برگ و ثمر جیسے ایک ڈال کے ہیں

جو رستے رہتے ہیں پیہم جگر کے زخم تمام عطا کیے ہوئے اشعؔر بس اک ملال کے ہیں